我痴故我在，我狂故你望過來

http://www.theztyle.com/blog/space.php?uid=18474&do=blog&id=28070

http://theztyle.com/blog/space.php?uid=18474&do=blog&id=28028

隨著這位朋友的離世，竟然令我回想起我媽死時的日子，再而，令我再深思在那個時間對我的影响。

事綠在昨晚放工，當我正低著頭看ipod　（我的電腦沒聲音，於是我將所有片子download然後轉換到ipod，而全部都是化妝片子）　的時候，猛然見到一個女的掂一下坐我旁邊男孩的衫袖，引導他看一下那個方向－－我的眼晴也隨著瞄了一下過去，見到一個身型佝僂、扶著手扙的婆婆正很不隱地站在車廂，旁邊她有一個像她女兒的物體攙扶著。既然如此個男人都好難置身視外的繼續坐下去，逐把位置讓給婆婆坐。
"佢旁邊個女唔知係咪幾十歲呢？" 我心想，不過我不敢看，繼續扮無事咁睇我既ipod。如果真係幾十歲而她又比我有需要的話，其實我心想自己都幾冷血。
我想起我的婆婆。
以前我們住東區，我婆婆是那種腰骨歪了不能常站著的人，每當架巴士一搖的時候，她是完全可以跟架巴士一齊同一個角度搖擺，所以每逢佢步履不穩咁上車，不出30秒就會即刻有個後生仔讓坐俾我婆婆。現回想起來，並不是現在的人比較自私沒有品問題，而是地區問題：香港區坐巴士的人通常車程不到20分鐘就會下車；相反，到元朗天水圍的人上巴士的話就成個鐘頭先會落車，而且仲要人多巴士班次疏，站著的話就要沙甸成個鐘頭先返到屋企，仲有好多人寧願行遠兩個站都要搭架巴士有位坐，咁你話果D人仲邊會有咁方便既良心呢？

從這件事令我意識到自己，自從我媽離去之後，雖然大家一起承受傷痛，然而慢慢發現，這個世界還是得我一個。家裡的兩個男人，都不是很有愛心的。尤記得有次我忘了帶鎖匙，屋企當然去晒返工無人，我打電話到我細佬同我老豆求救，然後搭架巴士上左我婆婆屋企；我細佬返工無得好講，不過我老豆是渣的士的，要他兜個圈、把車停到屋企樓下（一陣是可以的，並且間唔中咁做），先開口給我進屋，然後才繼續開工，其實這個要求都不為過，他們不但沒有特地趕回家、沒有快一點趕回家，甚至連通電話既時候都費時理我，一直要我等到他們會回家的時間（那時我返學，應該等4-5個鐘吧）才會順便開口給我。自此之後，我完全了解我家已經沒有了凝聚力，及後我甚至有兩套鎖匙，一套會放係公司（搬得大多，現在沒有LU），隨後都未試過無帶鎖匙。其實是因為現我家的鐵閘一定要用鎖匙關門，所以一定記得，反而我老公就試過幾次忘記帶鎖匙。
係現實當中，我是比較同情老人同小朋友，因為他們真的沒有能力、沒有力量，是要人去保護。相反我覺得年青成年中年健全的男人及女人，都應該要自立、自我幫助、甚至可以幫助別人。我其實好睇唔起果D食飯要搵人陪、去個廁所都要搵人陪(基於安全理由例外)行街要搵人陪睇衫要搵人陪睇戲要搵人陪（姥姥例外嘛，其實我是指什麼都要搵人陪的那種殘癈人士），而家仲有80後甚至見到都搵人陪，仲夠膽有個女仔話佢男友佢見工唔陪佢，仲陪佢陪到口黑面黑咁（個男人是特登請假的，可憐！）結果就俾其他網友媽叉左幾個版面。
你話呢D人係咪傷殘架？我能夠容許既原因之一只因我當佢地係老弱傷殘或細路，但到某個健全人拼命扮傷殘的爆發點可能我會一發不可收拾....

而另外一個原因，我可能係覺得，自己其實一直都一個人。尤其是我老公，起初我都有少少依賴，幾年前我知自己無料，我唔想搵番本來我做的工作，而且原來年紀大再加結婚無細路，果種眼光直情係一種奚落。曾經去一間大公司見工，本來心情都不錯，點之條死人HR（無錯，佢同條死屍無分別，下述）就成架播音機咁播晒佢要講既野。好啦，到佢問我有咩問題，我承認我係佢播音既時候無錄低，於是我再次問佢：現在請這個職位是跟什麼？跟住佢話：Woven 嘛，我咪講左囉（佢爭在無話你無聽書呀？）咁好啦，到佢問我點解想做呢份工，咁呢D例牌野，咪就會話我想做下大公司，多D機會見野學野咁囉。點之係呢個時候佢就發左一招終極死屍開臭口："咁點解你以前唔做大公司呀？"
嘩！我俾佢果招由地底call上嚟既硫磺簡直臭到傻左，除左動作上係非常之想一張摺櫈車埋去之餘，個心裡頭已經爆左： ":你係度侮辱緊我人格喎八婆！"呢只井底就梗係唔知道香港九成公司都只不過係中小企（好像是九成半公司），中小企無罪，無做過中小企就更加無罪！
"你咁講拉倒啦！"我心裡抑壓著本來應該噴出來的怒火，頭也不回咁逃出這個母夜叉管轄範圍既鬼域，真係衷心咁祝福佢成世做呢間大公司同成世坐呢個位，不過而家諗番起，佢可能已經不在世了。因為始終有一天會遇到一個八十後來見工，你知D八十後無咁大個熔爐裝咁大堆火架嘛，話唔定真係一個唔順眼扮古惑仔在線咁一張客椅兜頭就車埋去個母夜叉度，到時佢個頭可能就由"夜叉"變成"三叉"，再去幾百年修行都修唔番。
係呢度我最抑鬱既日子，竟然會一個親人口中聽到一句："你轉工？你咪當收錢去俾佢鬧囉！"直情係幾百條死屍加埋既臭口威力直燻過嚟，然後佢自己就自我血壓飊高發老脾。講真有邊個想做到明知自己唔得但俾人炒呀？我無一個人想同佢講，亦都無一個人想信，後來份工無左，再後來第二份工，同事非常好，雖然我沒有料，雖然這是一個死因，但另外一個死因是因為我亞姐曾經鬧過我："我們是team work來的，點解你覺得呢個世界係無人，東西收收藏藏，問題獨自面對，但你根本完全解決唔到？"
 就是這樣，我就失去了份比我現在多一倍人工的工作。或者這樣說，我從頭到尾都無乜料去搵這類的工。

原來我是有這種 "一個人" 的心態。呢個世界雖然係好大，但會幫我跟能幫我的人可以近乎說沒有。究竟我係咪無向身邊的人發出求救訊息呢？其實我都唔肯定哦，因為我能夠信任既人比可以幫同能夠幫的人更少，應該是說，我沒有甫開始就希望別人幫忙。
其他人，我想得衰一點，都是要渣我時間、以及要我幫助的人。

點都好，總之我唔應該接受，呢個世界只係得我一個人。

http://hk.apple.nextmedia.com/template/apple/art_main.php?iss_id=20100130&sec_id=4104&art_id=13679632

係公司通常都有開著FACEBOOK的習慣，而我亦有訂閱蘋果新聞。
1月29日大約3時左右，我發現蘋果貼了一則關於馬頭圍道冧樓新聞，我們一直開玩笑說的 "死人冧樓" ，原來會有一天變成真..... 我起初不敢驚動大家：咁咪即係無形中暗示俾人聽，"喂！我唔做野架，我成日上網架！"咁呀！但咁大件事唔講又好似好囉囉攣咁，於是，我講左俾老細個仔聽： "我好似見到有個閃過既標題話紅磡馬頭圍道有冧樓啊！" 俾老板個仔聽。

殊不知，原來佢住緊既土瓜灣同呢幢野係好近（第一：我從來不知土瓜灣在那裡；第二：我曾經從老細口中聽過幾個地址－－一是何文田、一是港景峰、一是土瓜灣，至於佢地真住係邊我從不知道）於是就變左佢好戳力係網上搵資料，搜到谷歌新聞是真有這段報導，隨後就通知埋係房既老豆、後面既uncle、隔籬既姑丈、再隔籬既大伯，大家一齊去睇呢段新聞。跟住，就打電話通知埋佢亞媽，叫佢千萬不要渣車經過紅隧～

我真係估唔到咁有關連。他們還說：我們吃完飯在這頭散步啊！昨晚才剛剛到過.....

發生呢件事時，我想起一段經文：當人們說平安穩妥時，災禍忽然臨到....
在學生時代，都唔多唔少聽到關係末世論或世界末日訊息，然而等到今時今刻，世界都還未曾末曰。到再有人講既時候，就會覺得：咩死人冧樓咁大件事？講極都唔知幾時，不如到時先話我知！
在未發生件事之前，如果有人話你知：呢層樓會冧呀！你從來都未見過香港發生件咁既事，根本就無可能相信－－就算係台灣四川D豆腐樓，都係地震先冧啫！你咒我間樓，我真係叉住你（呢幢樓好像得一個業主，應該全部都是租客）。再而有機會聽第二次，就會越來越反感，因為如果層樓係你既，你就會完全籠罩係你主觀既睇事法當中，對看到聽到的細節充耳不聞.....
終於，從沒想像過的事情正正在你眼前發生。

當然，我唔係SELL緊你買人壽保險，我覺得保險很多條例，很奸詐，你俾錢佢就易，但問佢收錢就煩。我只係想說，要對週圍觀察力高一點，有時還要拋開固有誠見，才會容易逃避到災難。雖然人始終一死，但在新聞看到這些情景，有想哭的感覺。
當我將冧樓這單事告訴我的一個朋友時，他竟說我看到你的MSN啊，海地死得仲多人啦，我而家個心好UP，我知個女仔唔會揀我，我祝佢同男友開心快樂.....
真係 "啤"　～　一聲。

在一月頭我曾經向人說起我的朋友忽然死了。
其實他並不算是平輩的朋友，他是我教會一個小組中的帶領員，而我在他的那個小組就有十年之久：看著他當時12歲的兒子、當時8歲的女兒，我後來結了婚就轉到別處，並以我的性格來說，我不會主動跟人聯絡，都有好一段時候並沒有怎樣跟他的太太聯絡。
我是那種怕到熟人的店、跟熟人買東西、又要挖癈話跟人嘻嘻哈哈的那種人，我會渴望沒有認得我，需要的時候隱形、沒需要的時候消失；人不犯我，我又不犯人……
我本來就是這樣冷血……但有可能隨著年紀漸長，漸漸地不再常怕做錯事就錯話，不再那麼怕被人訓話，而且開始明白較多其他人的性格，可以比較體諒到別人苦情，就比較沒有再那麼怕與別人相處。之不過我仍然癈話乾涸，「癈話洞」是空空如也，我就是個很難跟人打開話閘子的人。
這個叫「家聚」的小組，這個我曾叫「家主」的帶領員，我曾叫「家母」的太太……到現時為止，其實我都沒有打電話、或者親身去安慰過她，只是旁枝地去幫她抺新屋啦（但見不到她），或者今天到我家主的安息禮拜等。
嗯……十年來我跟他們的關係，大概是這樣。

我是在一個很錯誤的時間，知道他離去的消息，就正如我在一個很錯誤的時間，看到我媽離去的時候一樣：一個正在上班、旁邊還有人的時候，而另一個則在今我要讀書、明天我就要去考試的時候。
那個漫長的夜晚，我跟我爸、我弟弟坐在客廳的沙發，燈火通明了整個夜晚；我方才明白，原來我的悲傷是不能令時間多留住一刻，明天的預定就正滴滴答答的來臨，要達到目的就一直只能向前看。
猶記得那個時候，我們得到眾多親戚的同情，尤其我媽是一個非常非常非常喜歡幫助朋友、喜歡跟朋友聯群去旅行、以及非常能幹，可以既打工回到家又煮飯（仲幾乎餐餐有湯飲）兼後來被迫要抽晚上時間讀一個教師職位的人（現在的教師，是要讀一個什麼教師協會出來的，但我媽入職的時候當然沒有，後來被迫要補回這一個課程），到她喪禮的朋友就幾乎上山都漏掉通知一個，印象中算是很爆滿。然而這個對我來說並不是一個正面影響，就像現在叫小學生做的重組句子：
「小明是一個好人」「小明死了」　重組後：
「小明是一個好人，所以死了。」

我媽生前篤信天主教，所以每一個人都認為，我媽媽那麼好人，是會上天堂的。
一個人可以在一生裡頭都沒有信仰，但當她知道自己臨死前，或者後來在他身邊的人談及，他會上天堂嗎？或他會輪廻嗎？或者就只留下回憶的化滅。
但顯然，「化滅」這個原因並不成立。因為有些臨死前的人，會遇到些奇怪的事：就像我的爺爺，在醫院裡一時說好熱、一時又說有人捉他，以前大人互相傾談之間就說他在行黃泉路上。如果人是白白的去的話，就不會有這些奇怪事。
每個人都不知為什麼會來到世界，然後不知道自己在這個世界要做什麼，隨後就不知為什麼日後要去一個什麼的地方……

我相信這是每個人心裡的疑問，但暫時不去詳談。

在天主教裡頭是相信十惡不赦的人才會到地獄，信天主及其他人會到一個叫煉獄，把罪燒淨、又有世人及聖人為他們代禱代求以後他們才能上天堂。我是在年紀還小的時候已被我媽帶去信天主教，說到上天堂是一件美好的事，之不過，我卻很害怕：我很怕癌症會遺傳，來不及我的小孤雛成長啦、我爸又把我媽的「車頭相」掛到客廳中央，弄得我半夜不敢去廁所怕見鬼啦等等等等……　我根本就沒有所謂「平安」的信仰。

至我回到這間教會，明白聖經會有奬賞制度，但上天堂的救恩卻不是用功德賺回來，如果每一個人都有罪，苦行等並不能贖回，那你即跟我開玩笑吧！你的兒子不用賺什麼才是你的兒子，道理就是這樣。
雖然面對親人的離別非常傷感，然而在我心裡是真正感覺到，我們不是信口開河，是真的有一份盼望。究竟天堂地獄是否真實呢？其實都有人去過的，而且不只一個：
http://b5.ctestimony.org/200204/020423ttdy.htm
http://dalachurch.insightic.com/index.php?option=com_content&view=article&id=69:2009-07-27-19-03-05&catid=39:2009-07-27-19-08-56&Itemid=68

我是比較吃力去表達以上的想法及情感。寫完這篇文章以後，我才驚覺原來「好人會早死」的想法曾在我心中佔了一個很長的時間，人其實想用最短的時間擁有一切，卻發覺更加不夠時間……

到瞻仰遺容的時間，我所看到的家主，完全不是我認得的那個人──到底塞上什麼會樣米高積遜的鼻那麼尖呢？還有就是帶點亮的粉口紅，再加沒帶眼鏡的模樣……　軀體原來只不過真的是一個臭皮囊。

傳 7:2   往 遭 喪 的 家 去 、 強 如 往 宴 樂 的 家 去 、 因 為 死 是 眾 人 的 結 局 ． 活 人 也 必 將 這 事 放 在 心 上 。

我有兩副唔同度數（左眼跟右眼）既隱形眼鏡，今年六月到期，每盒仲有廿幾隻，所以我迫住要搵D時候帶埋佢～
世界立時清晰~
影番張相先。

1) 壯烈犧牲前之留念
我有個同事常加國香港兩邊飛，一年就大約飛六次，非常咁辛苦的。
這並不是公司要求，而是他要保留他的加拿大公民身份，條件是要一年住滿153日，所以哦.....
這次他帶了一些手信給我們：

如果大家覺得好食的話.... 那你遲來一步啦！他們都幾乎啃掉了。
這是一幅他們臨壯型犧牲時的相片。
我最欣賞當然是Mrs.Fields啦，以前我都見有食譜買，而家搵唔番囉！
我找到網上有食譜，之不過我無整開餅，唔圖文並荗咁睇，我係唔會明架，仲加埋寫英文的呢。
我唯一會不猶豫去買英文書就只有兩種：一種係化妝、一種係美術。
係youtube睇他妝video，係可以句句都明的～　

2) 送給你

這是我們駐場最爆的亞嬸洗過的杯。
即使是一大堆杯，佢都係唧咁細撻潔而亮。
有次用晒D潔而亮，但仲有成大支洗潔精，佢都唔會唧洗潔精，搵清水洗都等我支潔而亮，
又或者佢去廁所唧梘液洗都未定。
原來我老細都嫌佢洗杯唔乾淨（只係佢收得超平），嚇得他買了個消毒碗櫃。在起初我都只係負責抹乾佢D杯，漸漸地我就好似上茶樓咁搵熱水將佢D杯重新漱一次再抺乾，因為間唔中你都會發現有意外驚喜。
你地睇下上面張相！
佢已經好唔話得咁將僅有既潔而亮送晒俾你啦！
試過一次發覺潔小姐係個杯裡面.... 當然就無咁大贈送，但就危險在完全睇唔到... 只係摸到發現　"咦，咁滑既？" 先知道你已中奬啦～
呢位亞嬸對洗杯相當有經驗－－佢淨係會洗杯架啫，佢真係以為會無人知咁將D杯碟同杯蓋都拎起，因為佢個人認為果D配角部份係唔污糟架，你要記得話過佢知 "呢隻碟裝過甜野架，幫我洗下佢啦" 咁，佢先會撐話我有洗架我有洗架，然後先幫你拎入去係咁易過一下水～
佢真係好負責任，包保唔會打爛杯，同唔會飲死人架。
噓！你點證明你係咪用左個杯之後中毒啫，無證無據，你唔可以賴佢架。

仲有，大家要學識一樣野：就係工夫要做係表面。如果去到咁大撻潔小姐，通常就會係個杯面，你話知佢洗唔甩D唇膏印，但佢一定唔洗裡面都洗下個表面。
據我分析，佢只係攞入去，做個樣係咁易用果塊千年海綿抺下個表面，茶格都沖唔乾淨（邊個叫你日日都沖茶），就咁就算架啦～
我地有兩個office，果邊office就梗係無個我咁既廉價奴工貼身服侍呀，但佢當然知道以上既事，所以大家唔係飲樽裝水、就飲咖啡，幾條友飲4.8L既水都可以三日先飲得完一支，可想而知佢地係幾咁驚架呢～

如果你已經將生命豁出去，係臨死之前想一親潔小姐香澤既話，我介紹爆嬸幫你清潔呀！
記　得　搵　我　呀　！～　XD

繼上次那慘說及黑眼圈的慘痛經歷以後，我就去找一下治療黑眼圈的偏方。
原來黑眼圈是可以完全治療的，那個偏方說，雖然不太相信，但聽到這始終覺得是一件好事。
於是找天弄一下這個偏方，首先：

蜂皇漿1茶匙（我懶，用湯匙整少D代替）。
一邊塗臉，一邊可準備半匙沖來喝。
然後：

蜜糖１茶匙（無錯，又係我懶.... ）。

我想我已鐵定不會再戴隱形眼鏡～

從前有個低能仔，特登用相同角度，影左兩張 "鏡前" 同 "鏡後" 分別。

而果個裝得落成隻水餃既眼袋，係佢老豆遺傳既，係以前後生又夠瞓既時候，都有機會收得埋既。只係隨著年紀漸大，褲都著得大條D，乜都鬆晒，咁即使瞓足成日都只係腰酸骨痛，隻蝦餃就只會越來越大....

如果有世界末日、外星人侵入地球、planet X擦過地球的話，都唔見得比眼下有兩個planet 2乘X、以及外星物侵入眼下球感覺更加世界末日。

以前我聽過手術去眼袋，就是在表面打直，然後會割到一些脂肪出來（凝膠啫喱咁俾番你睇），且手術後勤用冰凍敷一段時間，然後條疤就唔會咁覺，上埋遮瑕既話，就直情會隱形添！

不過近來聽過再先進一點的駭人手術：就是在內部的下眼皮和眼球中間割開，然後把脂肪抽出來（嘩！我驚盲啊。）我老闆娘還見她的朋友手術後不錯，仲心郁郁想去做添！
講真，50幾歲，都唔係做乜職業，咁靚仲乜鬼啊。再加上動過刀，日後只會更顯老。

 

感歎 "青春，真可愛青春.... "

我呢半年都唔知做乜，忽然會注意自己儀容，然後會日日化下粧返工。

究竟係覺得青春無多，定係太多化妝品呢？

不過我知比較大的主因，就是冬天。夏天化妝嘛，朝早未返到公司就已經溶了。

可能冬天是賣出化妝品的旺季呢，再加上聖誔新年這些大時大節。

想當初我初進這間公司，頭一個月也是天天化妝的。

其實化了妝不會令人喜出望外，根本同事都未必記得會望你，只係你自己高興。

到現在我仍有信心，我不化妝，是不會變鬼的。

 

昨天剛剛收拾好化妝鏡，

將太久的丟掉，然後收拾得好，就是要說給自己聽：其實我有什麼跟什麼。

我看VIDEO，那個人將個抽屜分隔，化妝東東打竪放，於是我就找到合用鐵箱，將東東竪起。

這幾乎是我全部東西了。

我騰空了一個化妝箱，再幾乎空出另一個化妝箱～

化妝掃這樣子插，原來不太多。

我看youtube的video，那個女仔的化妝掃裝滿幾個筆插，然後密密麻麻的幾個抽屜就是粉底呀唇高呀什麼什麼的。

每個人塊面都係八寸丁方大（或者有些更大的），有時候東西買完不去用，會很浪費。

所以，要常常check下自己有什麼，咁就可避免買重覆的了。

 

我很少打理我的手指甲，

所以它既黑麻麻，又凹凹凸凸...

指甲反映健康嘛，所以我一早知道自己是有病的了～

這兩天終於的起心肝買磨指甲的東西：

好令啊！雖然你還見到黑麻麻的。

現我每天都看著它啊，呵呵！

 

最後附上今天的淡粧照一張。

昨晚我放了塊刮痧版出來，今天化粧前先按摩，再加上手機的拍照技巧：

塊面長晒！

呢張我覺得自己好肥，但就係相隔一個禮拜都無。

真係神奇！

係屋企化妝通常會漏掉最後一個步驟，就是－－塗唇膏！

我是習慣上車才會塗的。

 

希望大家天天都漂亮喔！